Çekdarên bi ser Tirkiyeyê ve vê mehê 41 kes girtine.
Navenda Belgekirina Binpêkirinan a Bakurê Sûriyeyê ragihand ku çekdarên komên Artêşa Niştimanî û Tehrîr el-Şamê yên di kontrola Tirkiyeyê de meha çiriya pêşin 41 kes girtine.
Li gorî Navenda Belgekirina Binpêkirinan, ev kes li Efrîn û hinek deverên din ên bakurê Sûriyeyê hatine girtin.
Navendê destnîşan kir ku çekdaran ji serê salê ve jî 501 kes girtine.
Her wiha 2022yan 720 kes û 2023yan jî herî kêm 478 kes bi destên çekdaran hatine girtin.
Dagirkirina Efrînê
Artêşa Tirkiyeyê û grûpên çekdarên ên di kontrola wê de, 20ê Kanûna Paşîn a 2018an ji asman û bejahiyê ve bi awayekî berfireh êrişî Efrînê kir ku wê demê di destê Kurdan de bû.
Piştî wê êrişa berfireh a bi çekên giran, bajarê Efrînê 18ê Adara 2018an ket destê artêşa Tirkiyeyê û grûpên çekdar.
Di encama êrişên giran û dagirkirinê de bi sed hezaran Kurd ji mal û milkên xwe bûn û ketin ser rê û dirbên koçberiyê.
Ji roja ku Efrîn ketiye bin dagirkeriya Tirkiyeyê ve girtin, binpêkariyên wekî dizî, talan, tecawuz, birîndarkirin, kuştin, revandin û şkenceyên li hemberî Kurdan berdewam dikin.
Rûdaw
