Polonyayê piştî êrîşa dronên Rûsî, bi awayekî fermî banga çalakkirina xala 4em a NATOyê kir

Piştî şeveke aloz ku tê de 19 balefirên bêmirov (dron) ên Rûsyayê qada asîmanî ya Polonyayê binpê kirin, hikûmeta Polonyayê îro bi awayekî fermî daxwaz kir ku xala 4emîn a Peymana NATOyê were çalakirin. Ev pêngava dîrokî piştî wê yekê hat ku hêzên parastina asîmanî yên Polonyayê, bi alîkariya hevpeymanan, herî kêm sê dronên Rûsî xistin xwarê.

Serokwezîrê Polonyayê, Donald Tusk, di daxuyaniyekê de ragihand ku ev bûyer “rewşa siyasî diguherîne”. Wî got, “Xistina van firokeyên bêmirov ên ku gefê li ewlehiyê dixwin, ne tenê bersiveke leşkerî ye, lê pêngaveke siyasî ya girîng e.” Tusk da zanîn ku piraniya dronan ji aliyê Belarûsê ve derbas bûne û ev yekem car e ku welatekî endamê NATOyê bi vî rengî rasterast bersivê dide binpêkirinên Rûsyayê.

Hevpeymaniya NATOyê jî piştrast kir ku ev bersivdan ne tenê ji aliyê Polonyayê ve, lê weke operasyoneke hevbeş hatiye birêvebirin. Di dema bûyerê de, pergalên parastina mûşekî yên Patriot ên Almanî, balafirên şer ên F-35 ên Hollandî, û firokeyên çavdêriyê yên Îtalyayê di rewşa amadebaşiyê de bûn û piştgirî dan hêzên Polonî.

Ev pêngava Rûsyayê rastî bertekên tund ên navneteweyî hat. Seroka Komîsyona Yekîtiya Ewropayê, Ursula von der Leyen, binpêkirin weke “bêwijdanî” bi nav kir û soza parastina “her santîmetreyek axa Ewropayê” da. Herweha Serokkomarê Fransayê, Emmanuel Macron, û Serokwezîrê Brîtanyayê, Keir Starmer, bi daxuyaniyên cuda ev êrîş şermezar kirin û piştevaniya xwe ya tam ji bo Polonyayê anîn ziman.

Çalakkirina Xala 4 tê wateya ku Polonya bi fermî daxwaz dike ku hemû welatên endamên NATOyê li ser vê gefa li dijî ewlehiya xwe bicivin û bi hev bişêwirin. Tê çaverêkirin ku di rojên pêş de nûnerên daîmî yên NATOyê li Brukselê ji bo nîqaşkirina pêngavên hevbeş ên li hemberî vê zêdebûna aloziyê bicivin. (PK)