Hewlêr (Rûdaw) – Partiya Demokrat a Kurdistanê (PDK) berbijêrên xwe ji bo postên Serokê Herêma Kurdistanê û Serokwezîrê Herêma Kurdistanê bo çar salên bê diyar kir.
Bi biryara Encûmena Serkirdetiya PDKê, Nêçîrvan Barzanî ji bo Serokatiya Herêma Kurdistanê û Mesrûr Barzanî ji bo Serokwezîriya Herêma Kurdistanê hatin berbijêrkirin.
Berdevkê Partiya Demokrat a Kurdistanê (PDK) Mehmûd Mihemed piştî civîna Encûmena Serkirdetiya PDKê di civîneke çapemeniyê de naveroka civînê eşkere kir û ragihand: “Bi biryara Encûmena Serkirdetiya PDKê, Nêçîrvan Barzanî ji bo posta Serokê Herêma Kurdistanê û Mesrûr Barzanî ji bo posta Serokwezîrê Herêma Kurdistanê hatin berbijêrkirin.”
Nêçîrvan Îdrîs Mistefa Barzanî
21ê Îlona 1966an li Barzan ji dayîk bûye
Serokwezîrê Herêma Kurdistanê û Cîgirê Serokê PDKê ye
Sala 1975an li gel malbata xwe koçberî Îranê bûn
Li Zanîngeha Tehranê Beşa Zanistên Siyasî qedandiye
Sala 1989an bûye endamê Polîtburoya PDKê
Sala 1996an bûye Cîgirê Serokwezîrê Herêma Kurdistanê
Sala 1999an bûye serokwezîr (kabîneya çarem)
Sala 2011ê bo 2013 careke din bûye serokwezîr
Sala 2013an careke din postê serokwezîriyê wergirtiye heta 2018an
Niha berbijêrê PDKê ye ji bo posta Serokê Herêma Kurdistanê
Mesrûr Mesûd Mistefa Barzanî
Sala 1969an ji dayîk bûye
Endamê Polîtburoya Partiya Demokrat a Kurdistanê ye
Sala 1985an bûye Pêşmerge
Xwendina amadeyî li Îranê temam kiriye
Li Zanîngeha Washingtonê di siyaseta navdewletî de bawernameya lîsansê bidest xistiye
Sala 2005an Rêxistina Xêrxwazî ya Barzanî damezrandiye
Sala 2010ê bûye endamê Polîtburoya PDKê
Sala 2012yan bûye Rawêjkarê Encûmena Asayîşa Herêma Kurdistanê
Bi zimanên Fransî, Erebî û Îngilîzî dizane
Niha berbijêrê PDKê ye ji bo postê Serokwezîrê Herêma Kurdistanê (kabîneya nehem)
