Lijneya Hilbijartinê ya Wanê di destpêkê de ji bo namzedîya DEM Partîyê ya serokatîya Şaredarîya Wanê serîlêdana Abdûllah Zeydanî qebûl kirîye û Abdûllah Zeydanî jî li gorî vê qebûl kirinê bûye berbijêr. Lê nuha Lijneya Hilbijartinê ya Wanê birayara xwe ya ewil tune dihesibîne û dibêje ‘’Abdûllah Zeydan nikare bibe berbijêr’’. Ev biryara Lijneya Hilbijartinê ya Wanê biryareke nehiqûqî ye, keyfî ye, antî-demokratîk e û nîşana binpê kirina îradeya gelê Wane ye. Em vê biryarê qebûl nakin û protesto dikin.
Ez bangî gelê me, bangî hemû rêvebir û endamên DEM Partîyê dikim da ku, li himberî neheqîya ku li Abdûllah Zeydan û li gelê Wanê hatîye kirin, li himberî vê biryara antî-demokratîk, em xwe ji şîdetê dûr bixin. Em bi rêyên meşrû, sivîl û demokratîk , nerazîbûna xwe nîşan bidin. Jixwe hinek odaxên tarî dixwazin rewşê aloz bikin û gelê me bînin provoskayonan. Divê hemû hêzên sîyasî û gelê me di wî warî de pir hîşyar bin.
Ez bangî hemû hêzên ewlekarîyê yên Dewleta Tirkîyeyê jî dikim da ku rêzê li bertekên demokratîk, meşrû yên gelê me bigrin û xwe ji şîdetê dûr bixin.
Divê demildest ev biryara antî-demokratîk, neqanûnî ku îradeya gelê Wanê binpê dike, bê rawestandin û Lijneya Hilbijartinê ya Wanê mazbeteyê bide Abdûllah Zeydanî.
03.04.2024
Mustafa Ozçelîk
Serokê Giştî yê Partîya Welatparêzên Kurdistanê (PWK)
