Belgefîlma bi navê “Li Kurdistanê Şev û Mij” (Night and Fog in Kurdistan) ya li ser Kurdên Êzidî jî hat nîşandan li Festîvala 17emîn Rojên Belgefîlman a Documentarist a Stenbolê hat nîşandan.
Li Stenbolê 17emîn Rojên Belgefîlman a Documentarist, îsal di 8ê Hezîranê de dest pê kir û wê heta 13ê Hezîranê berdewam bike.
Di çarçoveya festîvalê de ji 70yî zêdetir belgefîlm cih digrin.
Belgefîlma bi navê “Li Kurdistanê Şev û Mij” ya li ser Kurdên Êzidî jî hat nîşandan.
Derhênera ji bajarê Mehabadê yê Rojhilatê Kurdistanê Şîlan Saadî, sala 2015an dest bi kişandina dîmenên 7 keçên Êzidî ên penaber dike û li nav kampa Amedê behsa jiyana wan a rojane dike.
Belgefîl behsa êş û trajediya 7 keçên Êzidî dike
Derhênera Kurd Şîlan Saadî bi vegotin û rêwîtiyên xwe yên 4 salan, behsa êş, trajedî, komkujî, rêwîtî, xewn û xeyal, hevaltî û rêwîtiya 7 keçên Êzidî ji kampa Amedê ber bi Ewropayê ve dike.
Belgefîlm sala 2019an li welatên Ewropayê bi dawî dibe.
Di çarçoveya festîvala belgefîlman de di nav 70 belgefîlman de 3 belgefîlmên din ên Kurdî jî cih digirin.
“Civaka Êzidî gelek êş û komkujî jiyane”
Çalakvanê mafên mirovan Bîlal Yildiz ji Rûdawê re got:
“Di nav Kurdan de civaka Êzidî gelek êş û komkujî jiyane. Ev belgefîlm jî vê nîşanê me dide.
Wê demê em jî wek komeleyên mafên mirovan li kampên Êzidiyan bûn û me rewşa wan bi çavên xwe didît.”
Temaşevan Aziz Tekin jî got:
“Festîvalên bi vî rengî derfetên baş in ku em dikarin fîlmên bi Kurdî û fîlmên din ên cîhanê temaşe bikin.
Me bi hevalan re belgefîlma Li Kurdistanê Şev û Mij temaşe kir. Bi rastî gelek bibandor bû.”
Ji xeynî belgefîlma bi Kurdî ya “Li Kurdistanê Şev û Mij”, 3 belgefîlmên din jî “Stêrka li Sînor”, “Dargeçit” û “Xabûr” bi Kurdî ne an mijarên wan li ser Kurdan e.
Documentarist piranî bala xwe dide mijarên li ser mafên mirovan û ekolojiyê.
“Mijarên belgefîlman jî curbicur in”
Koordînatorê Bernameyê Necatî Sonmez jî got:
“Di festîvalê de ji 70yî zêdetir belgefîlm cih digrin. Jê 30 heb ji Tirkiyeyê ne.
Belgefîlmên me di salên 2023 û 2024an de hatine kişandin. Mijarên belgefîlman jî curbicur in.”
Derhênerên navdar ên cihanî Jean-Gabriel Périot, Hubert Sauper û Laila Pakalnina jî wek mêvanên rûmetê hatine vexwendin û dê dersên sînemayê bidin sînemahezan.
Derhênerê Fransî Jean-Gabriel Périot got:
“Ji bo ez beşdarî vê festîvalê bûm pir kêfxweş im. Ji bo min derfeteke baş dibe ku ez bi mirovan re têkilî dideynim û ji wan hînê fikrên û nirxandinên nû dibim.
Tiştekî pir xweş e ku mirov fîlmên xwe li devereke din bide nîşandan.”
Derhênerê Awisturyayî Hubert Sauper jî got:
“Ji bo ez li ser sînemayê ders bidim hatim vexwendin.
Ji bo vê yekê ez pir kêfxweş im ku li Stenbolê me. Ez piranî belgefîlmên polîtîk çêdikim.”
17emîn Rojên Belgefîlman a Stenbolê Documentarist, îsal di 8ê Hezîranê de dest pê kir û dê heta 13ê Hezîranê berdewam bike.
Di çarçoveya festîvalê de ji 70yî zêdetir belgefîlmên ji welatên cîhanê û Tirkiyeyê cih digirin.
Rûdaw
