Sabrina Singhê destnîşan kir, “Di erkê hêzên me yên li Sûriyeyê de ti guherîn çênebûye, erkê me yê li Sûriyeyê tenê nehiştina DAIŞê ye û ji ber vê yekê hêzên me li wir in.”
Singhê diyar kir: “Em wekî hevpar bi HSDyê dixebitin lê ev jî girîng e ku tenê sedema hebûna me ya li Sûriyeyê û erkê me nehiştina DAIŞê ye, êdî çi bi rêya operasyonên hevbeş be çi jî bi lêdanên me yên heyî.”
Singhê her wiha got, “Me bi eşkereyî gotiye ku derfeteke mezin li Sûriyeyê heye û metirsiyeke mezin jî heye, dibe ku her du di heman demê de wekhev bin.
Alîkara Berdevkê Pentagonê Sabrina Singhê pirsên Berpirsê Ofîsa Rûdawê ya Washingtonê Diyar Kurde bersivandin.
Rûdaw: Ez niha li odeya konferansa rojnamegeriyê ya Pentagonê me. Sabrina Singh, Alîkara Berdevkê Pentagonê li gel min rûniştiye û em li ser çend mijarên têkildarî Rojhilata Navîn, xasma Sûriyeyê gotûbêjê dikin. Gelekî spas Sabrinayê ku te derfet da min ez li vir li gel te rûnim.
Sabrina Singh: Bêguman, spas ji bo te. Ez kêfxweş im ku ez li gel we me.
Rûdaw: Spas. Ka em ji Sûriyeyê dest pê bikin. Amerîka di van demên dawî de hêzên zêdetir şandine Sûriyeyê, ev jî piştî ketina rejîma Beşar Esed bû. Çima we ev biryar da û we çima ev hêz şandine Sûriyeyê? Rola wan çi ye û heta kengî dê li wir bimînin?
Sabrina Singh: Divê ez hinekî ji te re rast bikim. Ev hêzên me ji mêj ve li wir in, berî ketina Beşar Esed bi gelekî.
Rûdaw: Mebesta te ew 2000 leşker in?
Sabrina Singh: Rast e, ew hêzên me hebûn.
Rûdaw: Ez behsa hêzên zêdekirî dikim, ew 1100 leşker.
Sabrina Singh: Ew hêz, ew hejmara ku tu behs dikî, ew 2000 leşker çend sal in li wir in. 900 leşkerên me yên sereke hebûn ku her tim beşeke sereke ya operasyona têkbirina DAIŞê li Sûriyeyê bûn. Carinan me hejmara hêzên xwe li herêmê li gorî guherîna şiyanan zêde kiriye. Carinan me karmendên xwe guhertine dema tên û diçin, carinan jî dubarebûn heye.
Lewra carinan te dîtiye ku hejmara leşkeran zêde bûye, lê ev hejmar ti carî ne di bersiva ketina Esed de bû. Ew 2000 leşkerên ku me di konferansên rojnamevanî yên Pentagonê de li vir behsa wan kiriye, ji bo demeke dirêj hejmareke cihgirtî bû û ne bersivek bû ji bo ketina Esed.
Rûdaw: Ango tu ji min re dibêjî ku ew 2000 leşker tewra berî ketina rejîma Beşar Esed jî li Sûriyeyê bûn?
Sabrina Singh: Rast e, ev tiştekî ragihandî bû. Ne di bersiva ketina Esed de bû, ti guhertin di statûya hêzên me de li Sûriye yan Îraqê çênebûye û ti guhertin jî di erkên me de li wan her du welatan çênebûye. Erk tevlihev in û ew erk jî ku ez piştrast im ku haya te û temaşevanan jî jê heye, erka têkbirina DAIŞê ye. Lewra hêmana sereke û sedema hebûna hêzên me li Sûriyeyê û ew 2000 leşkerên ku tu behsa wan dikî, ji bo piştrastbûna ji têkbirina berdewam a DAIŞê ye.
Rûdaw: Ango niha 2000 leşkerên we hene. Çend baregehên we li Sûriyeyê hene? Ma baregeheke we li Kobaniyê heye ku gelek rapor behsa baregeha demkî ya Amerîkayê li Kobaniyê dikin? Yan jî tu dikarî ti agahiyekê li ser vê yekê bidî me?
Sabrina Singh: Derbarê Kobaniyê , ez dikarim bi piştrastî ji te re bibêjim ku Amerîka di bin vê birêvebiriyê de ne planeke wê heye ji bo avakirina baregehê û ne jî baregeheke wê li herêma Kobaniyê heye. Derbarê cihê baregehên me yên li deverê de, ez nikarim hejmareke diyar bidim te, lê ez dikarim ji te re bibêjim ku em li bakur û rojhilatê Sûriyeyê ne. Ev ew der e ku em di dehsala borî de her tim lê bûn. Ji wir ve hêzên me dixebitin dema ku kar têkildarî erka berdewam a têkbirina DAIŞê be. Lê di vê birêvebiriyê de, birêvebiriya Biden û Harris, ne plan heye û ne jî karekî berdewam heye ji bo avakirina baregeha Amerîkî li navçeya Kobaniyê.
Rûdaw: Te got ew li Sûriyeyê ne ji bo têkbirina DAIŞê, lê hevalbendeke we li Sûriyeyê heye ku li gel we DAIŞê têk dibe, ew hêz ji ber gefên din hatine mijûlkirin ku ji komên nêzîkî Tirkiyeyê û hevalbenda we ya NATOyê, ango Tirkiyeyê tê. Min şopand ku Wezîr Austin çend caran bi telefonê li gel hevtayê xwe yê Tirk li ser vê mijarê axiviye. Ma hûn li gel Tirkiyeyê gihiştine jihevtêgihiştinekê derbarê pirsgirêkên wan li gel Hêzên Sûriya Demokratîk û hevkarên we yên li Sûriyeyê? Ji ber ku rast e hûn ne li wir in ji bo parastina wan, lê ew alîkariya we dikin di têkbirina DAIŞê de, ku ev jî bandorê li erka we ya li wir dike?
Sabrina Singh: Girîng e bê bîra me dema ku em qala erka têkbirina DAIŞê dikin, em beşek ji hevpeymaniyeke cîhanî ne. Ew hevpeymaniya navneteweyî welatên seranserî cîhanê li xwe digire ku têdigihêjin her çi qasî DAIŞ ne wekî berî deh salan gef e, lê hîn jî gef e.
We ev li vir li Amerîkayê dît dema me êrişa New Orleansê dît ku êrişker ji aliyê DAIŞê ve hatibû handan. DAIŞ belav dibe û ji bo gihiştina xelkê rêyan dibîne, çi li welatan be yan jî bi rêya torên civakî. Loma bila ez vegerim ser pirsa te ya li ser çawaniya erka me û telefonên wezîr li gel Tirkiyeyê û hevtayê xwe. Ez bawer im ku hemû têdigihêjin û bêguman roleke wan heye li vir ji bo piştrastkirina ku DAIŞ careke din venagere wê rewşa berî deh salan.
Tirkiye têdigihêje ku em jî ji wan gefan têdigihêjin ku li hemberî Tirkiyeyê ne, lê ya ku me li gel Tirkiyeyê kiriye û we dîtiye ku wezîr kiriye, pêwendiyeke vekirî ye û her çi qasî ez nikarim behsa wê yekê bikim ku rêvebiriya paşerojê dê çi biryarê bide, ez tenê dikarim behsa vê rêvebiriyê bikim.
Me gelekî bi zelalî diyar kiriye ku mebest û erka me tekezî li ser erka têkbirina DAIŞê kiriye û hevalbenda me di wê erkê de Hêzên Sûriya Demokratîk e û bêguman li gel wê hevpeymana navneteweyî jî.
Rûdaw: Ango dema hevalên we yên li Sûriyeyê gef li wan tê kirin ji aliyê komên din ên nav Sûriyeyê, ma di berjewendiya we de ye ku hûn wan biparêzin an axaftinê li gel welatên din û hevala xwe ya NATOyê bikin ji bo ragihandina agirbestê, da ku hûn bikaribin tekeziyê li ser erka xwe li Sûriyeyê bikin?
Sabrina Singh: Bi baweriya min, beşek ji wê ya ku tu amaje pê dikî ew rageşî ne ku li devera Kobaniyê derketine holê. Niha em dibînin ku rêkeftinek an jihevtêgihiştinek di navbera her du aliyan de heye û heta radeyekê me rawestana tundûtîjiyê li wê herêmê dîtiye. Lewra em pêşwaziyê li wê yekê dikin. Dema mijar têkildarî gefên din li dijî hevkarên me û hêzên din ên deverê be, bêguman em vê bi cidî werdigirin, lê em nikarin rê bidin ku me ji erka me dûr bixe, ku piştrastbûn e ku DAIŞ nikare careke din serî hilde û gef êli hêzên Amerîkayê bixwe, gef li hevkar û hevalbendan me li navçeyê bixwe û gefê li welatê me bixwe, loma em li Sûriyeyê ne.
Rûdaw: Niha li Sûriyeyê, grûp û komên cuda hene ku Şamê bi rê ve dibin, dema ku em behsa hikûmeta nû ya Şamê dikin, sîstemeke me ya bergiriyê ya nû heye. Ra û nerîna we çi ye derbarê sîstema bergiriyê ya nû ya Sûriyeyê ku HTŞ serokatiya wê dike, ma ti nîgeraniyên we derbarê şerkerên biyanî yên di nav wê komê de nînin ku di van demên dawî de pileya hinekan ji wan hat bilindkirin û postên bilind di Wezareta Bergiriyê û sîstema bergiriyê ya nû ya Sûriyeyê de wergirtine?
Sabrina Singh: Ez bawer im girîng e ku em bi bîr bînin ku gotina gelê Sûriyeyê li ser çawaniya birêvebirina hikûmet û welatê wan heye. Em xwe ji wê pêvajoyê dûr naxin. Lê di dawiyê de gelê Sûriyeyê paşeroja welatê xwe diyar dike.
Li gel vê hikûmeta nû ku pêk tê, divê ez tekez bikim ku gelekî nû ye û, serkirdeyên HTŞyê hemû tiştên rast dibêjin, lê divê kirinên wan bi gotinên wan re bibin yek. We dît ku şandeke Amerîkî çû û hevdîtin li gel vê serkirdatiyê pêk anî. Xwezî min karîbûya vêga bi zelalî ji te re bigota paşeroja Sûriyeyê dê çawa be, lê em hîn ligel vê yekê nû ne, nexasim di wê yekê de ka ev hikûmet dê çawa pêk were û çawa hev bigire. Lewra ji bo bersiva pirsa te, ez bawer dikim divê em li bendê bin û bibînin ev hikûmet dê çawa be, lê di dawiyê de dikeve ser gelê Sûriyeyê ku wê diyar bike.
Rûdaw: Li gorî tiştê ku HTŞyê heta niha kiriye, mehek derbas bûye.
Sabrina Singh: Rast e, mehek e. Belê, mehek e. Loma em bawer in girîng e ku ev li bîra me be.
Rûdaw: Belê, ango ti nîgeraniyên we derbarê ewlehiya paşeroja wî welatî de tune ne?
Sabrina Singh: Bêguman, hene.
Rûdaw: HTŞ ji Bereya Nusrayê hatiye û têkiliyên wan bi Qaîdeyê re hebûn?
Sabrina Singh: Me bi eşkereyî gotiye ku derfeteke mezin li Sûriyeyê heye û metirsiyeke mezin jî heye, dibe ku her du di heman demê de wekhev bin. Derfet ji bo paşerojeke demokratîk heye, yan ew paşeroj dê çawa be, lê divê ji aliyê gelê Sûriyeyê ve biryar li ser were dayîn. Metirsiya mezin ew e ku em dizanin komên nola DAIŞê mifayê ji rewşeke wiha werdigirin, ji rewşên ku serokatiyeke zelal nîne û dibe ku tevlihevî hebe. Ev e ya ku em naxwazin bibînin. Lewra em li Sûriyeyê ne û lewra hebûna me li Sûriyeyê gelekî girîng e. Ji bo piştrastbûnê ye ku DAIŞ nikare sûdê ji wê kêliyê wergire ku gelê Sûriyeyê paşeroja xwe diyar dike. Divê em rê bidin wan ku vê yekê bikin.
Rûdaw: Hin gotûbêj di navbera Şamê û Hêzên Sûriya Demokratîk, hevkarên we de hene. Ma hûn piştgiriyê li Hêzên Sûriya Demokratîk dikin ji bo çûna Şamê û gotûbêjkirina li ser çawaniya beşdariya wan di sîstema bergiriyê ya nû ya Sûriyeyê de? Gelo ev tiştek e ku hûn piştgiriyê lê dikin? Hûn alîkariya wan dikin ji bo ku bibin beşek ji wê sîstema bergiriyê ya nû yan hûn hîn jî bawer dikin zû ye ji bo vê biryarê?
Sabrina Singh: Ez bawer dikim ya ku ez dikarim bibêjim ew e ku ez tenê dikarim li şûna vê dezgehê biaxivim, lê ez nikarim li şûna Hêzên Sûriyeya Demokratîk biaxivim li ser ramanên wan di vê mijarê de.
Rûdaw: Ev dezgeh çawa li ser vê mijarê difikire?
Sabrina Singh: Ev dezgeh çawa li ser vê mijarê difkire? Bi rêya erka me. Erka me hîn neguheriye. Loma dema têkildarî erka têkbirina DAIŞê be, bêguman berjewendiya me di wê yekê de ye ku em piştrast bin DAIŞ nikare vegere xaleke ku gefê li hêzên Amerîkayê bixwe û bibe gef li ser ewlehiya welatê me. Lewra em her tiştî dikin ji bo piştrastkirina ku ew erk di vê rêvebiriyê de jî berdewam dibe.
Tu dizanî, ez bawer dikim divê Hêzên Sûriya Demokratîk biryarê bidin paşeroja wan dê di vê hikûmeta nû ya ku tê avakirin de çawa be. Ev ne ya Amerîkayê ye ku biryarê li ser bide. Ya ku ez dikarim bibêjim û dikarim li şûna Hêzên Sûriya Demokratîk li ser biaxivim, hevkariya me di têkbirina DAIŞê de ye.
Ez dubare dikim, te got temenê vê hikûmetê mehek e. Belê temenê wê mehek e, loma divê em rê bidin tişt berdewam bikin û derkevin. Ez bawer im tu hemû pirsên rast dikî. Li cem me jî heman pirs hene.
Rûdaw: Baş e, eger biryar ya HSDyê be ku bide, eger biryar da ku bikeve nav sîstema bergiriyê ya nû ya Sûriyeyê û ji we re got, baş e, em dê biçin Şamê û hevkariyê li gel wan bikin. Hûn dê bibêjin, baş e, em pêşwaziyê li wê biryara we dikin, yan hûn dê bibêjin, divê em li ser bifikirin?
Sabrina Singh: Ez bawer im ew pirseke girîmaneyî ye, lewra ez nikarim bersiva te bidim.
Rûdaw: Baş e, bila em li bakurrojhilatê Sûriyeyê bimînin.
Sabrina Singh: Kerem ke.
Rûdaw: Berpirsên Kurd di çend rojên borî de ramaneke wiha anîne zimên ku hêzên Fransa û Amerîkayê kontrola sînorê bakurê Sûriyeyê bigirin dest ji bo çareserkirina nîgeraniyên ewlehiyê yên Tirkiyeyê, ku hûn bawer dikin ew nîgeraniyên wê yên ewlehiyê hene. Gelo berpirsên Kurd têkilî bi we re danîne û ma we ti carî gotûbêj li ser vê ramanê kiriye? Hûn çawa li vê pêşniyarê dinêrin? Hûn bawer in pêşniyareke mînakî ye ji bo ku hûn hevkarên xwe li Tirkiyeyê û hevparên xwe li bakurrojhilat dilxweş bikin?
Sabrina Singh: Min dîtiye ku hin rapor derbarê cureyeke pêşniyar an rêkeftina li gel hêzên Amerîkayê û hêzên welatên din hene. Haya min ji tiştekî wiha nîne.
Ez dubare dikim, tişt li wê herêmê berdewam di pêşveçûnê de ne. Karê me yê sereke, erka me, baldariya me, hîn neguheriye û sedema me ya tekane ya hebûna me li Sûriyeyê piştrastkirina wê yekê ye ku DAIŞ nikare serî hilde. Loma ev dê di baldariya me de bimîne. Ez dubare dikim, min ew rapor dîtine, lê tiştekî min tune ku ez di vî warî de pêşkêş bikim.
Rûdaw: Ango hûn ji bo têkbirina DAIŞê li Sûriyeyê ne. Lê wekî min berê behs kir, hin tişt hene ku we ji vê erka we dûr dixin. Ma hûn ti carî li ser nobedariya sînorê bakurê Sûriyeyê fikirîne ji bo çareserkirina nîgeraniyên ewlehiyê yên Tirkiyeyê, yan ev ramaneke nû ye? Pêşniyareke nû ye ji bo we?
Sabrina Singh: Binêre, dema mijar têkildarî avakirina her cure baregeheke zêde be, ez bawer dikim ya ku tu amaje pê dikî, dîsa herêma Kobaniyê ye. Di vê rêvebiriyê de ti plan tune ji bo avakirina baregeheke Amerîkî li Kobaniyê yan li wê deverê.
Ez dubare dikim, cihê hêzên Amerîkayê li navçeyê û li Sûriyeyê di wê beşa bakurrojhilatê welêt de ye û baldariya me li ser wê derê ye. Tu bi xwe dizanî ku vêga nexşeyek li ber min tune, lê tu dikarî lê binêrî û tu dikarî bibînî hêzên Amerîkayê li kû ne. Aniha nêzîkî Kobaniyê nînin. Lewra ez dubare dikim, divê ez wan raporan red bikim ku hatine belavkirin û dabaşa wê yekê dikin ku em dixwazin cureyekî pêkhatina hertimî ava bikin. Di vê rêvebiriyê de çend rojên me mane, loma di vê rêvebiriyê de ev di plana me de nîne.
Rûdaw: Gelekî baş e, ez bawer dikim dema rêvebiriya nû tê ser desthilatê, bîrxistina jihevtêgihiştinê di navbera vê rêvebiriyê û rêvebiriya nû de heye derbarê hin mijarên pir girîng ji bo berjewendiyên Amerîkayê. Ango di rojên bê de, dema ku rêvebiriya Trump dest bi kar dibe, gelo ti jihevtêgihiştin di navbera vê rêvebiriyê û rêvebiriya bê de heye derbarê hêzên we li Îraq û Sûriyeyê?
Sabrina Singh: Çi cure jihevtêgihiştin?
Rûdaw: Ji bo mayîna hêzên we li wir, yan tenê parastina tekeziya we li ser DAIŞê, çiku DAIŞ hîn têk neçûye?
Sabrina Singh: Ez dizanim tu çi dipirsî…
Rûdaw: Me cara berê dît, dema ku hêzên Amerîkayê di bin rêvebiriya Trump de ji beşên Sûriyeyê vekişiyan, pirsgirêkeke mezin bû ji bo hevkarên we û tewra hingê jî DAIŞ têk neçûbû. Ma hûn li gel rêvebiriya bê axivîne derbarê wan hêzên li Sûriye û Îraqê ku ji bo demeke dirêjtir li wir bimînin?
Sabrina Singh: Ez ê vê ji te re bibêjim derbarê gotûbêjên li gel rêvebiriya nû. Yekem, ev serok û wezîr pabendî piştrastkirina destbidestkirineke aram in. Dema guherîn bi ser partiyên siyasî û rêvebiriyeke nû de tê, dema destbidestkirin pêk tê, em wan ji her cure tiştekî derbarê operasyonan haydar dikin. Tu pêgeha hêzên Amerîkayê li deverê dizanî.
Dibe ku li ser komek mijarên berfireh be. Di dawiyê de, ti bîrxistina jihevtêgihiştinê derbarê piştrastkirina tiştên diyarkirî nîne. Di dawiyê de, dikeve ser rêvebiriya paşerojê, dikeve ser serokê paşerojê ku biryar bide ka dixwaze çi bike. Lewra vêga, ez tenê dikarim li şûna rêvebiriya Biden û Harris û vî wezîrî biaxivim.
Ev wezîr, bêguman wekî fermandarê berê yê Sentralkomê, kesekî ku li Îraq û Efxanistanê xizmet kiriye, bi dîtina min, ji girîngiya têkbirina DAIŞê têdigihêje û ji girîngiya hêzên me li Sûriyeyê têdigihêje û bêguman em hêvî dikin rêvebiriya bê û wezîrê bergiriyê yê bê jî ji vê yekê têbigihêjin.
Binêre, ew dê bibin biryarder. Dê werin nav vê dezgehê, her roj li gel wan mêr û jinên ku piştgiriya wê erkê dikin dicivin. Dibe ku derfeta wan a serdana deverê hebe. Di dawiyê de, dikeve ser rêvebiriya paşerojê biryar bide ka dê çi li gel hêzên me bike.
Rûdaw: Baş e, ez dizanim ku demeke te ya pir kêm maye û pirsên min ên zêde hene. Bila em qala Îraqê bikin, li Îraqê Heşda Şebî, hêzên Heşda Şebî hene ku beşek in ji sîstema bergiriyê û nîgeranên we ji hin koman in li Îraqê heye. Hûn hîn jî di gotûbêjê de ne li gel Îraqê derbarê çawaniya avakirina hevkariyeke nû ya ewlehiyê li gel Îraqê. Tiştekî te heye ku tu li gel min behs bikî derbarê nîgeraniyên we yên derheqê komên mîlîs ên Îraqê ku Îran piştgiriya wan dike?
Sabrina Singh: Nîgeraniya me tam ew e ku komên mîlîs li Îraq û Sûriyeyê hene û Îran piştgiriya wan dike. Mebesta min ew e, me gelekî bi eşkereyî behsa nîgeraniyên xwe kiriye derbarê êrişên li ser hêzên Amerîkayê, ew êrişên ku li wir me ji erkê dûr dixin.
Binêre, ne veşartî ye. Îran hewl dide tevliheviyê çêbike û hewl dide ziyanê bigihîne wan hêzên Amerîkayê û hevpar û hevalbendên me ku li herêmê ne. Ez bawer im we dîtiye ku Amerîkayê di serdema vî wezîrî de gavên mezin avêtine ji bo lêpirsînê li komên ser bi Îranê û lêpirsînê li Îranê. Ka em vê dorfirehtir bikin. Tu dizanî, em ji Îraq û Sûriyeyê dûrtir binêrin û li hin karên ku me kirine ji bo piştgiriya hevkarên xwe li Îsraîlê binêrin.
Divê tu li Nîsan û Çiriya Pêşîn bifikirî, dema ku Îranê gelek mûşekên balîstîk ber bi Îsraîlê ve avêtin. Roleke Amerîkayê ya mezin di xistina hinekan ji wan de û parastina welatiyên Îsraîlê li wir hebû. Ez bawer im girîng e em bifikirin ku bêguman me bi awayên cuda lêpirsîn li gel Îranê kiriye, çi bi rêya komên nûnerên wan, wekî Hûsiyan an komên mîlîs ku li Îraq û Sûriyeyê dixebitin an rasterast li gel Îranê bi xwe.
Rûdaw: Gelo hûn gelekî zelal bûn li gel hikûmeta Îraqê derbarê van komên mîlîs li Îraqê ku beşdar in û êrişî Îsraîlê dikin? Êrişî balyozxaneya we kirine, êrişî hêzên we li Îraqê kirine. Ma hûn gelekî zelal bûn li gel wan çima wan koman kontrol nakin?
Sabrina Singh: Di gotûbêjên xwe de li gel hikûmeta Îraqê em gelekî eşkere bûn û…, êdî ez tenê ewqasî dibêjim.
Rûdaw: Bila ez pirsa xwe ya dawî bikim.
Sabrina: Kerem ke.
Rûdaw: Hevkariya we li gel hêzên Pêşmerge li Herêma Kurdistana Îraqê heye û hûn piştgiriya wan dikin ji bo pêkanîna çaksaziyê û anîna hemû hêzên Pêşmerge bo bin sîwana Wezareta Pêşmerge. Ma nirxandina we ya dawî derbarê van çaksaziyan û yekkirina hêzên Pêşmerge li Herêma Kurdistanê heye?
Sabrina Singh: Ti agahiyeke min a nû li ser wan çaksaziyên ku tu behsa wan dikî nîne. Ez dikarim ji te re bibêjim ku bêguman em spasiya karên hêzên Pêşmerge dikin û, diyar e ku em li gel hêzên ewlehiyê yên Îraqê dixebitin dema têkildarî erka me be ji bo piştrastkirina têkbirina berdewam a DAIŞê, lê agahiyên min ên zêdetir li ser wan çaksaziyan nînin.
Rûdaw: Gelekî spas Sabrina.
Sabrina Singh: Spas.
Rûdaw: Ez gelekî kêfxweş im ku tu li Rûdawê bûyî û ez gelekî dilxweş bûm bi karkirina li gel te di çend salên borî de.
Sabrina Singh: Bêguman gelekî spas ji bo we. Karkirina li gel te tiştekî bêhempa bû û ez gelekî kêfxweş im ku ez îro li vir im.
Rûdaw: Gelekî spas.
Rûdaw
