Parêzer û mafnas Sidki Zîlan da zanîn ku “Dewlet dixwaze di pêvajoya nû de Ocalan û DEM Partî, YPGyê îqna bikin ku çekên xwe dayîne”.
Parlamenterên DEM Partiyê Pervîn Buldan û Sirri Sureyya Onder çûn Girava Îmraliyê û wan bi Rêberê PKKyê Abdullah Ocalan re hevdîtinek kir.
DEM Partiyê derbarê naveroka hevdîtinê daxuyaniyeke nivîskî belav kir û got:
“Di hevdîtinê de ku pêşhatên dawî yên li Rojhilata Navîn û Tirkiyeyê hatin nirxandin, Birêz Ocalan ji bo senaryoyên siberoja tarî yên hatine ferzkirin, çareseriyên erênî pêşkêş kirin.”
Parêzer Sidki Zîlan ji Amedê beşdarî bultena Rûdawê bû û pirsên Hawar Celaledînê yên li ser mijarê bersivandin.
Parêzer û mafnas Sidki Zîlan ragihand ku berê destê Kurdan û PKKyê xurttir bû û niha jî li Rojavayê Kurdistanê destê Kurdan xurt e.
Sidki Zîlan da zanîn ku di pêvajoya nû de dixwazin Ocalan û DEM Partî, YPGyê îqna bikin ku çekên xwe dayîne.
Hinek xalên girîng ên ku parêzer û mafnas Sidki Zîlan anîne zimên wiha ne:
“Her çi qas înkar bike jî Qendîl hevalê Esed û Îranê bû.
Di pêvajoya nû de dixwazin Ocalan û DEM Partî, YPGyê îqna bikin ku çekên xwe dayîne.
Li çar parçeyên Kurdistanê mijara Kurdan Rojavayê Kurdistanê ye.
Tirkiye ji bo ku li Rojavayê Kurdistanê çek werin danîn ji Ocalan û DEM Partiyê alîkariyê dixwaze.
Pêwendiya YPGyê ya bi Amerîkayê re ne bi dilê Qendîlê bû.
Berê destê Kurdan û PKKyê xurttir bû.
Li Rojavayê Kurdistanê destê Kurdan xurt e.”
Rûdaw
