Li navçeya Sirûcê ya parêzgeha Rihayê ya Bakurê Kurdistanê parêzer Yilmaz Bîrden ku dixwest muwekîlê xwe bibîne li rastî êrişa polîsan a bi çekê hat.
Baroya Rihayê li ser bûyerê li ser hesabê xwe yê Xê daxiyaniyek belav kir.
Yilmaz Bîrdenê ku tê dermankirin dê giliyê polîsan bike.
Li gorî agahiyên ku hatine wergirtin, Yilmaz Bîrden dixwest bi muwekîlê xwe yê li Birêvebiriya Trafîkê ya Sirûcê dihat ragirtin re hevdîtinê bike ku ji polîsan lêxistibû.
Hat îdiakirin, dema ku Bîrden di daxwaza xwe ya hevdîtinê de israr kir, polîsan bi tundî bi çekê li serê wî xist û ew birîndar kir.
Yilmaz Bîrdenê ku serçavê wî di nava xwînê de ma, li Nexweşxaneya Dewletê ya Sirûcê tê dermankirin.
Parêzerên Baroya Rihayê çûn cihê bûyerê û bûyer tomar kir.
Polîsên têkildar îdia kir ku Bîrden “li hemberî polîsan rabûye”.
Yilmaz Bîrden dê giliyê li polîsên ku li wî xistiye bike.
Baroya Rihayê daxuyanî da
Baroya Rihayê derbarê bûyerê daxuyaniyek da û anî ziman:
“01.04.2025an destûr nehat dayîn ku hevkarê me Parêzer Yilmaz Bîrden bi muwekîlê xwe re hevdîtinê bike.
Hevkarê me li ser îdiayên ku muwekîlê wî hatiye lêdan îtiraz kir lê piştî vê îtirazê rastî destêwerdana fîzîkî ya personelên operasyonên taybet û polîsan hat.
Wan li hevkarê me xist û ew birîndar bû û bi ambulansa ku hat gazîkirin veguhest nexweşxaneyê.
Serokê Baroya me Parêzer Abdullah Oncel, Navenda Mafên Parêzeran û Endamên Komîteya Birêvebir pêvajoyê ji nêzîk ve dişopînin.
Wekî Baroya Rihayê, em bi rêzdarî radigihînin ku em dê li pey êrişa neqebûlkirî ya li dijî hevkarê me bin û em dê li dijî berpirsyaran dest bi pêvajoyên hiqûqî bikin.” (Rûdaw)
