Serekê Pêroyî yê PWKyî Mustafa Ozçelîk, roja 10.08.2024, Teşkîlatê Amedî ya PWKyî de, kombîyayîşê çapemenî de, derheqê prosedura fermî yê nameyê Partîya Welatparêzanê Kurdistanî (PWK) û dewaya qefilnayîşî de agahdarîyê muhîmî dayî û tabelaya PWKyî amey aliqnayîş.
Temsîlkatə PSK, HAK-PAR, DDKD, DILKURD, Komeleya Şirneqîjan, Komeleya Şemrexî û gelek sîyasetmedar û roşinvîrê kurd û rayber û endamê PWKyî beşdarî kombîyayîşê çapemenî bîyî.
Mustafa Ozçelîkî kombîyayîşê çapemenî de nê malûmatî dayî:
‘’PAK( Partîya Azadîya Kurdistanî) û TDK-TEVGERî (Tevgera Demokratîk a Kurdistanî) pa kesanê xoseran 9-10ê êlûla 2023î de Diyarbekir de kongreya xo ya yewitîye kerd û 10ê êlûla 2023î de, Partîya Welatparêzanê Kurdistanî (PWK) amey ronîyayîş.
Semedo ke PWK sey partîyêka aşkere û qanûnî xebatanê xo biko, PAKî 17ê êlûla 2023î de, Anqara de çimdarîya Heyetê Weçînayîşî de kongreya xo ya hîrêyîne viraşt. Na kongreya qanûnî de, Partîya Azadîya Kurdistanî (PAK) nameyê xo bedilna û kerd Partîya Welatparêzanê Kurdistanî (PWK).
La çi heyf ke, Serdozgerîya Mehkemeya Berze (Yargitay) nêwaşt şey fermî nameyê Partîya Welatparêzanê Kurdistanî (PWK) qebûl biko, nêverda ma sey PWK kongreyanê xo yê bajar û qezayan bike. Xora goreyê qanûnê partîyan, heqê her partîyêke esto ke kongreya xo ya pêroyî de name, bername, tuzuk û logoyê partîye bibedilno; la helwestê Serdozgerê Yargitayî vera Qanûnê Partîyan bi.
Avukatanê ma, nê derheqî de Yargitay û Mehkemeya Qanûnê Bingehînî rê mektube erşawit ke wa nameyê PWKyî bêro qebûlkerdiş.
Badê ke Serdozgerê Yargitayî roja 16ê gulana 2024î de ame bedilnayîş; Serdozgerê Yargitayî yo newe nameyê PWKyî qebûl kerd û sey fermî PWKyî rê mektube erşawit.
Ma roja ke PWK ame ronîyayîş ra heta ewro her wext nameyê PWKyî xebatanê xo de xebitna. Ewro ra tepîya zî, ma do bi fermî heme tabelayanê partîya xo, bi namê PWKyî bialiqnê.
PWK hem partîyêka meşrû, hem zî yasayî ya. PWK xo sey rêxistinêka bêîtîatîyê sivîl vîneno.
Helbet, her çiqas namê PWKyî ameyo qebûlkerdiş zî dewaya qefilnayîşî ya ke verê cû semedê PAKî ameybî akerdiş, nika PWK ser ra dewam kena.
Ma heta ewro Mehkemeya Qanûnê Bingehînî ya Cimhûrîyetê Tirkîye de, bi kurdî û bi tirkî name û bernameyê partîya xo pawito û nika ra tepîya zî, ma do nameyê PWKyî û bernameyê ey mehkemeyan de bipawê. Ma vanê w ana dewaya qefilnayîşî wedarîyo û heqê ma esto ke ma sey partîyêka meşrû, hem zî sey partîyêke yasayî xebatanê xo bidomnê; Ma do her wext nê heqê xo rê wayîr vejîyê.
Hetê Serdozgerê Yargitayî ra qebûlkerdişê nameyê PWKyî têkoşînê dewaya azadîye de, destvistişê heme kurd û kurdistanîyan o û wa şarê ma rê pîroz bo’’.
Buroya Çapemenî ya Partîya Welatparêzanê Kurdîstanî (PWK)
ZN
