Wezîrê Derve yê Amerîkayê Marco Rubio got, Îran ti carî çekê atomî bidest naxe û tekez kir Amerîka rê nade Îranê çekên etomî bidest bixe.
Ev daxuyaniya Marco Rubio di dema beşdarbûna wî ya di civîna Wezîrên Derve yên NATOyê de li Brukselê hat dayîn, ku tê de eşkere kir: “Donald Trump ji nêz ve çavdêriya vê mijarê dike û bi kelecaneke mezin li benda gavên pêşerojê ye.”
Rubio herwiha amaje bi wê yekê kir, “Ti welatek li cîhanê naxwaze Îran bibe xwediyê çeka etomî û ev yek nîşan dide ku Washington dê li ser hewlên xwe yên dîplomatîk berdewam be, ji bo misogerkirina ku Tehran nikaribe bigihîje vê armancê.”
Pêştir jî, Serokê Amerîkayê Donald Trump ragihandibû, derbarê gihiştina lihevkirinekê li ser bernameya atomî, wî nameyek ji Rêberê Bilind ê Îranê re şandiye.
Trump herwiha aşkere kir, Washington ji bo çareserkirina krîzan du vebijêrkan li ber çavan digire, ew jî leşkerî û dîplomasî ne, lê danûstandin ji bo wî, di rêza yekem de ye.
Di sala 2015an de, Îran, Brîtanya, Almanya, Çîn, Rûsya, Amerîka û Fransa gihiştin peymaneke hevpar, ew jî sivikkirina cezayên li ser Taranê bû, li hember sînordarkirina bernameya wê ya etomî.
Di Gulana 2018an de, Amerîka di dema serokatiya Trump de, bi awayekî yekalî ji peymanê vekişiyabû û cezayên li ser Îranê ji nû ve sepandibûn. Vê yekê hişt ku Tehran gav bi gav pabendiyên xwe yên etomî kêm bike. (K24)
