Rojnameya Öz Diyarbakır, ku 40 sal in bê navber tê weşandin, ji ber zehmetiyên aborî hatiye derxistin firotinê. Heke kiriyar neyê dîtin, dê were girtin. Rêxistinên çapemeniyê bang li rêveberên bajêr û saziyên civaka sivîl dikin ku piştgiriyê bidin çapemeniya herêmî.
Rojnameya Öz Diyarbakır, ku yek ji du rojnameyên herêmî yên herî kevn e li Amedê, di 24’ê Nîsana 1984’an de dest bi weşanê kir û niha 40 sal in berdewam e. Lê belê, krîza aborî ya li Tirkiyeyê bandor li ser vê rojnameyê jî kir, û niha ew di xetereyê de ye ku were girtin.
Xwediyê rojnameyê biryar da ku rojnameyê derxe firotinê. Heta niha rojname nehatiye firotin, lê heke kiriyarek neyê dîtin, dê were girtin. Ev rewş nîşan dide ku çapemeniya herêmî bi krîzeke cidî re rû bi rû ye.
Sedemên krîza rojnameyê
Birêvebirê Giştî yê Weşanê yê rojnameyê, Îhsan Ozdemîr, diyar kir ku ji ber zêdebûna bihayên kaxez, boyax û mesrefên din, herwiha kêmbûna xwendevan û daketina reklaman, hatinên rojnameyê êdî têrê nakin. Wî got ku biryara derxistina firotinê bi dilêşî hate girtin, lê ev biryar ji girtina rojnameyê çêtir e.
Ozdemîr wiha got: “Ji ber zêdebûna mesrefan û kêmbûna hatinê, me biryar da ku rojnameyê derxin firotinê. Heke em nekarin bifiroşin, mixabin emê neçar bimînin ku rojnameyê bigirin.”
Rewşa çapemeniya herêmî
Serokê Komeleya Çapemeniya Herêmî, Ferhat Mehmetoxlu, diyar kir ku xetera girtina rojnameyeke 40 salî xemgînker e. Wî bang li rayedarên bajêr û saziyên civaka sivîl kir ku piştgiriyê bidin çapemeniya herêmî.
Mehmetoxlu wiha got: “Divê serokwezîr, walî, şaredar û hêzên aborî yên bajêr piştgiriyê bidin medyaya herêmî. Divê ew bê cudahî piştgiriyê bidin hemû radyo, televîzyon, rojname û malperên înternetê. Heke ev piştgirî neyê dayîn, em ê gelek dengên girîng ên herêmî winda bikin.”
Pêşniyarên ji bo çareseriyê
Serokê Komeleya Rojnamevanên Herêmî yên Başûrê Rojhilatê Anatolyayê, Mesut Fîgançîçek, pêşniyar kir ku ji bo çapemeniya herêmî kêmkirina bac û piştgiriya pereyên sîgortayê were dayîn.
Fîgançîçek wiha axivî: “Mesela, em niha kaxez, qalip û madeyên kîmyewî bi ferqa sed, sed û pêncî ji sedî distînin. Lê hatina me her tim eynî ye. Tu hatina me ya guherbar tune ye. Divê dewlet bi teşwîqên taybet mesrefên sîgortayê yên rojnameyan kêm bike û bacên li ser kaxezê rake.”
Bi vî awayî, çapemeniya herêmî li Amedê bi krîzeke mezin re rû bi rû ye û bang li rayedaran tê kirin ku gav bên avêtin ji bo parastina vê çavkaniya girîng a agahdariyê, berî ku ew bi temamî winda bibe.
Çavkani: VoA Tirkî
