Konfederasyona Revenda Kurdistanî bangî Kurdên li welatên ku balyozxaneyên Îranê lê hene kir ku beşdarî xwepêşandanên 20ê mehê bibin.
Li cîhanê bertekên li ser êrişa mûşekên balîstîkî ya Îranê ya li Hewlêrê didomin.
Konfederasyona Revenda Kurdistanî jî li ser malpera xwe daxuyaniyek belav kir û got:
“Konfederasyona Revenda Kurdistanî bangî Kurdistaniyên li diyasporayê dike ku li welatên Ewropayê li ber Balyozxaneya rejîma Îslamî ya Îranê, roja Şemiyê 20ê Kanûna Paşîna 2024an xwepêşandanekê li dijî tawanên rejîmê li dar dixe.”
“Erkên xwe yên neteweyî bînin cih”
Konfederasyona Revenda Kurdistanî di daxuyaniya xwe de herwiha anî ziman:
“Roja şemiyê li dijî tawanên rejîma Îranê û li dijî tawanên dagirkeran ku Rojavayê Kurdistanê, Rojhilatê Kurdistanê û Başûrê Kurdistanê didin ber bombebaranan, tawaneke herî dawî şeva borî bi çend mûşek û bi dronan êrişî Hewlêra paytexta Başûrê Kurdistanê kir.
Lewra Konfederasyona Revenda Kurdistanî biryar da ku li hemû welatên Ewropayê û Amerîkayê ku Kurd lê hene li ber balyozxaneyên Komara Îslamî xwepêşandanên girseyî li dar bixin.
Eger polîs destûrê ji bo ber deriyên balyozxaneyan nede, li wî welatî li cihekî din ê ku guncav be xwepêşandan bikin.
Hemû navend, federasyon, komele û rêxistinên Kurdistanî yên diyasporayê yên ku girêdayî Konfederasyona Revenda Kurdistanî ne, xwe ji bo xwepêşandanê amade dikin.
Em bangî hemû Kurdên ku li welat û bajarê ku xwepêşandan pêk tê dikin ku erkên xwe yên neteweyî bînin cih.”
Çi bûbû?
Supaya Pasdaran a Îranê, şeva 15ê Kanûna Paşîn êrişî Hewlêra paytexta Herêma Kurdistanê kir.
Di vê êrişa Îranê de 4 sivîlan canê xwe ji dest da û 16 kes jî birîndar bûn.
Îranê derdora demjimêr 23:30î bi 11 mûşekan êrişî Hewlêrê kir û pênc ji wan li mala sermayedarê Hewlêrê Pêşrew Dizeyî ketin.
Pêşrew Dizeyî, keça wî Jîne, mêvanê wî û xizmetkareke mala wî cane xwe ji dest da.
Li mala Dizeyî amadehî dihatin kirin ku piştî 10 rojan rojbûna ewil a Jîneyê were pîrozkirin lê wê ji ber êrişên Îranê saleke tenemê xwe jî temam nekir.
Hevjîna Dizeyî û du kurên wî jî di heman êrişê de li mala xwe birîndar bûn. Rewşa tenduristiyê ya kurekî wî xerab e û niha li Îmarata Erebiyê tê tedawîkirin.
Li aliyên din, Dijeterora Kurdistanê jî heman rojê ragihand, 3 dronên bombebarkirî yên ku armanca wan Balafirgeha Navneteweyî ya Hewlêrê bû, xatine xistin.
Berpirsê Operasyonên Taybet ê Ajansa Parastin û Îstixbaratê Ebdula Hemereşîd ji Tora Medyayî ya Rûdawê re da zanîn ku wan bi rêya sîstema parastina esmanî du mûşekên Îranê xistine xwarê.
Sibeha 16ê Kanûna Paşîn demjimêr 05:50î jî dîsa li nêzîkî Balafirgeha Hewlêrê dronek ketibû xwarê û teqiyabû.
Nûçegihanê Rûdawê Sîdar Leşkirî da zanîn ku ew dron a grûpa bi nave Berxwedana Îslamî ya Îraqê bûye.
Ev êrişên Îranê hem li nav Kurdan hem jî li qada navneteweyî bûn sedema gelek bertekan.
Welatên wekî Amerîka, Çîn, Fransa, Almanya, Tirkiye û Fînlendayê ev êriş şermezar kirin.
Dîsa gelek partî, sazî û rêxistinan Kurdan jî bertekên tund nîşanî van êrişên Îranê dan û wan Îran şermezar kir.
Rûdaw
