Wezîrê Karên Derve yê Fransayê hişyarî da ku eger danûstandinêm li ser bernameya atomî ya Îranê bi ser nekevin, rûbirûbûneke leşkerî bi Îranê re “hema bêje misoger” e.
Wezîrê Karên Derve yê Fransayê Jean-Noel Barrot li parlamentoya Fransayê axaftinek kir.
Jean-Noel Barrot got “Di rewşa têkçûnê de, rûbirûbûneke leşkerî hema bêje misoger e. Ev yek dê li herêmê bibe sedema aloziyeke mezin.”
Pirsgirêka bernameya atomî ya Îranê dîsa derketiye pêş û Serokê Amerîkayê Donald Trump gef li Îranê dixwe ku eger li ser bernameya atomî li hev nekin, dê wê bombebaran bike.
Trump di hevpeyvînekê de bi kanalê CBS Newsê ya Amerîkî re got:
“Eger ew bi me re li hev nekin, bombebaran dê çêbibe. Bombebaranek dê çêbibe ku wan berê tiştekî wisa nedîtiye.”
“Îran hewl nade çekên atomî çîbike”
Wezîrê Karên Derve yê Îranê Ebas Eraqçî doh li ser hesabê xwe yê Xê di nivîsekê xwe de got:
“Dibe ku Serokê Amerîkayê girîngiyê nade rêkeftina atomî ya sala 2015an.
Lê ew rêkeftin pabendiyeke sereke ya Îranê dihewîne ku hîn wekî xwe maye û tenê Amerîka jî ku li derveyî rêkeftinê ye jê sûd wergirtiye.”
Eraqçî her wiha got, “Îran dubare dike, qet û di ti rewşekê de hewl nade ku li dû çekên atomî bigere, çêbike yan bi dest bixe.”
Çarşema borî, Îran bi rêya Umanê bi fermî bersiva nameyeke Trump da ku tê de Serokê Amerîkayê pêşniyar kiribû li ser rêkeftineke nû ya atomî gotûbêj bikin, eger na wê bijareyên din li dijî Îranê bi kar bîne.
Trump di nameya xwe de du meh molet dabû Îranê da ku rêkeftineke nû bike, berevajî vê yekê, Amerîka dikare êrişeke leşkerî li hemberî Îranê pêk bîne.
Serokkomarê Îranê Mesûd Pizîşkiyan, yekşema borî got ku Tehran niha gotûbêja rasterast bi Amerîkayê re nake, lê tekezî kir ku di nameya xwe de ji bo Trump, bijardeya gotûbêjên nerasterast dûr nexistine.
Serokkomarê Îranê amaje bi wê yekê kir, berpirsiyariya avakirina baweriyê li ser milê Amerîkayê ye, ji ber ku ev Trump bû ku sala 2018an bi awayekî yekalî ji rêkeftina atomî vekişiya.
Şandina balafiran
Di van çend rojên dawî de, artêşa Amerîkayê çend balafirên bombebarkirinê yên radar-şikên ji cûreya B-2 şandin baregeha leşkerî ya Diego Garcia ya li Deryaya Hindê, ku li gorî medyaya Amerîkayî, pêwendiya wê bi wê moleta du mehî re heye ku Trump daye Îranê.
Ew balafirên şer dikarin bombên mezin ên di bin axê re bibin hilgirin ku di rewşa êrişkirina ser baregehên atomî yên di bin erdê de yên Îranê, rola wan a girîng dê hebe.
Bersiva Xamîneyî
Rêberê Olî yê Komara Îslamî ya Îranê Elî Xameneyî 31ê Adara 2025an li Tehranê pêşnimêja cejna Remezanê kir, dûvre gotarek pêşkêş kir.
Xamîneyî tê de amaje bi rewşa herêmê, êrişên Îsraîlê yên li ser Xezeyê û Libnanê, siyaseta Amerîka û welatên rojavayî ya li hemberî Komara Îslamî ya Îranê û gefên vê dawiyê yên berpirsên Amerîkayê yên li dijî Îranê kir.
Rêberê bilind ê Komara Îslamî ya Îranê amaje bi aloziyên di navbera Îran û Amerîkayê kir û tekezî kir, helwesta wan nehatiye guhertin, eger êrişî Îranê were kirin, bersiveke tund a wan dê hebe.
Elî Xameneyî got, “Bila her alî bizanibin, helwesta me her heman helwesta berê ye. Dijminatiya Amerîka û rejîma zayonîst, her heman tişt e ku berê hebû.
Gef dixwin ku êrişkariyê dikin, bê guman eger êrişkariyek çêbibe, em gelekî dilniya nînin, em bawer dikin ku îhtimala zêde nîne ku êrişkarî ji derve çêbibe, lê eger êrişkariyek çêbibe, bi dilniyayiyê li hemberî derba wan, derbeke tund a me dê hebe.”
“Tundûtîjî, tundûtîjiyê tîne”
Li aliyekî din, Berdevkê Wezareta Karên Derve ya Îranê Îsmaîl Beqayî li ser Xê de bersiv da gefên Serokê Amerîkayê Donald Trump.
Îsmaîl Beqayî di peyama xwe de dibêje, “Gefa aşkere ya bombebarkirina Îranê ji aliyê Serokê welatekî ve dijayetiyeke eşkere ye bi cewherê aştî û ewlehiya navneteweyî re.”
Berdevkê Wezareta Karên Derve ya Îranê amaje pê kir, ew bersiva her êriş û gefekê didin û got:
“Tundûtîjî, tundûtîjiyê tîne û aştî aştiyê pêk tîne. Amerîka dikare hilbijêre… bi şopwêr û encamên wê ve.” (Rûdaw)
