Çek berdan û fesîha PKKê baş e, lê helwesta li dijî statûbûna Kurdistanê xiyanet e…

Divê hemû kurd û kurdperwer û rêxistinên Kurdistanê vê xirabî û plana Dewlet-Ocalan baş nas bikin, li dijî vê planê û ev nêrîna koletî derkevin.

Îbrahîm GUÇLU

Serokê MHPê yê nîjadperest Dewlet Bahçelî di meha Cotmehê de di Meclîsê de diyar kir ku divê serokê PKKê Ocalan bê qeyid şert diyar bike ku PKKê dev ji çek berde û xwe ji holê rake.

Piştî vê daxûyaniyê gengeşiyan dest pê kir.

Beşek Kurdan gotin ku Ocalan vê yeke nake.

Beşek Kurdan û min jî jî, diyar kir ku Ocalan ev daxwaza Bahçelî dê cîbicı bike.

Min du sedem nişan didan.

Sedeman yekemin: PKKê bi deste Dewleta Tirk ava bibû, Ocalan di destpêkê de hevalê dewletê bû. Ocalan pişt re jî (piştî 23 salan) bi dewlet û Hikûmetê re kar dike.

Sedema duyemîn, heger bi Ocalan re danûstandin û li hevkirinek nebe, Bahçelî ev daxûyaniyê nedikarî peşkeş bike.

Di encamê de derket holê ku Bahçelî berhewa û bê wate û bê agahdariya Ocalan ev daxûyaniya pêşkêşî raya giştî ya Kurd û Tirk nekiriye.

Di encamê de dema ku Şanda Rêxistina PKKê ya legal/vekirî DEMê serîlêdana çûna cem Ocalan kir, rastî derket holê ku Bahçelî bi zanyariya du terefen daxûyanî daye.

******

Piştî ku Şanda DEMê çû cem Ocalanjî gengeşiya ku Ocalan dê çi bibêje dest pê kir. Dîsa di vir de gengeşî û minaqeşeya ku Ocalan ev daxwaza Bahçelî pêk bîne, an na, bû mijarekere girîng.

Beşek Kurdan digot ku Ocalan dê çekberdanê û ji holêrabûna PKKê girêdayî şertan îlan bike.

Beşek Kurd û min jî jî digot ku Ocalan dê bê qeyid şert îlan bike ku PKKê dev ji çek berde û xwe ji holê rake.. Lê PKKê, girêdayî berjewendiya berpirs û dewletên PKKê birêve dibin, dê dev ji çek bernade.

Ocalan, di encamê de piştî şanoyekê di 28ê Sibatê de daxwaza Bahçelî û Hikûmetê bê qeyid şert pêk anî.

1-Biryara xwe ya derbarê çekberdan û jiholêrabûna PKKê îlan kir.

Ev biryareke baş e.

Lewra kurdperwer û Rêxistinên Kurdistanê li hemû beşên Kurdistanê her dem diyar dikirin ku divê PKKê dev ji çek berde.

Beşekî kurdperweran û Rêxistinên Kurdistanêû min jî digotin ku PKKê him dev ji çek berde û him jî PKKê tasfiye bibe.

Lewra PKKê bi deste dewleta Tirk li dijî Tevgera Bakurê Kurdistanê û Rêxistinên Kurdistanê ava bibû. Pişt re jî PKKê li hemû beşên Kurdistanê bi rêberiya Dewletên Kolonyalîst li dijî Tevgerên Neteweyî yên hemû beşan û Rêxistinên hemû beşên Kurdistanê bi kar hat. Gelek zirar da Neteweya Kurd û Kurdistanê.

Ji bona ku Dewleta Federa Kurdistanê têk biçe bi dijminên Kurdan re ket nav tîfaqên qirêj. Hîn jî ev tîfaqa dom dike.

Piştî ku daxûyaniya Ocalan ji aliye Şanda DEMê ve li Stenbolê bi civîneke çapenî hat îlan kirin, berpirsên PKKê yên li Qendîlê diyar kirin ku daxûyaniya Ocalan qebûl dikin û dê Kongreyekê li dar bixin û daxwazên Ocalan pêk bînin.

Lê dema daxûyaniya Qendîlê bê xwendin, tê dîtin ku wek dewlet daxwaz dike, Qendîl, dê daxwazên Ocalan cîbicî neke. PKKê xwe dê bi awayekî nû xwe eorganîze û ava bike.

Ev diyar dike ku Kurd û Kurdperwer û rêxistinên Kurdistanê dê di bin sîwaneke nû ya reorganîzeke nû de bi PKKê re rûberû bibin.

2-Ocalan di daxuyaniya xwe de li dijî Dewletbûna Kurdistanê, federalîzmê, otonomiye (Hikmû Zatiyê), xweseriya siyasî û kulturî jî nêrîn anîn ser zimên. Ev nêrîna jî li dijî Neteweya Kurd û Kurdistanê ye. Xizmeta Dewletê ye.

Ocalan di daxûyaniya xwe de diyar dike ku ji bona ku sedemên çek ji bo PKKê name ne û PKKê misyona xwe qedandiye divê bê qeyid-şert dev ji çek berde û xwe wek rêxistin ji holê rake.

PKKê, ji bona ku Li Tirkiyeyê dawî li sîstema kolonyalist ya Tirk bîne, li Kurdistanê dawiya îlxak û îşgal bîne, Dewleta Kurdistanê ava bike, Yekîtiya Neteweya Kurd û Kurdistanê ava bike, dest bi çekdarî kiribû.

Lê dema li Tirkiyeyê û Kurdistanê û li rewşa Neteweya Kurd binêrin: Dewleta Tirk wê deme sîstema xwe ya kolonyalist, îşgal û îlxaka xwe li Kurdistanê didomîne. Neteweya Kurd ji hemû mafên xwe bêpar e. Kurd ji mafê çarenivisiyê bêpar e. Dewleta Tirk sîstema xwwe ya Kolonyalîst, îşgal û îlxaka xwe li Kurdistanê dom dike. Kurd bi tu awayî xwediyê dewletê nînin

Ev jî diyar dike ku PKK bi van armancan ava nebûye û ji b ovan armancan dest bi şer nekiriye.

Daxûyanî û nêrînên Ocalan ev nêrînên kurdperweran û Rêxistinên Kurdistanê derbarê PKKê rast derdixw ku. PKK li dijî neteweya Kurd û Rêxistinên Kurdistanê ava bûye.

Loma jî Ocalan di vê qonaxê de jî dîsa xirabiyê li Kurdan dike û li dijî berjewendiya neteweya Kurd tevdigere, siyaset û stratejîya fermî ya Dewletê di derbarê Neteweye Kurd û Kurdistanê de diparêze.

Loma jî dibêje ku Dewlete Neteweyî û Federalîzm û Otonomî (Hikmû Zatî) û Xweserî û Azadiya Kultıurî li dijî sosyolojiye.

Dîsa diyar bû ku Ocalan dê mîsyoneke nû ya ne baş bidomîne.

Divê hemû kurd û kurdperwer û rêxistinên Kurdistanê vê xirabî û plana Dewlet-Ocalan baş nas bikin, li dijî vê planê û ev nêrîna koletî derkevin.

Di vê qonaxê de kêmtirin hîn xurtti û bi rêxistinî ji bona Dewleteke Hevbeş ya Federal têkoşîn û xebat bimeşîn. Lxdema ku ji bona federali xebat û têkoşîn bê meşandin, dive ev xebata di navenda Dewletbûna Kurdistanê û Yekîtiya Neteweya Kurd-Kurdistanê were meşandin.

Diyarbekîr, 02. 03. 2025

(Ev nivîs tenê nêrînên şexsî yên nivîskar derdixe pêş û temsîla nêrînên giştî yên malpera me nake. Berpirsiyariyên huqûqî yên vê nivîsê aîdî nivîskar in.)