HELBESTVAN Û SIYASETVANA ÇALAK DIYA CÎWAN A ROJAVAYÊ KURDISTANÊ KOÇA DAWÎ KIR…

Îbrahîm Guçlu

Min îşev derengî ji DUHOKê xeberek nexweş û xemgîn girt ku xwuşka delal Diya Cîwan a Rojavayê Kurdistanê îro serî sibê koça dawî kiriye.

Min Diya Cîwan di sala 1981an de li Şamê li Taxa Kurd Rûkneddînê nas kir.

Diya Cîwan, Ji Cizîra Botan (Botî) bû. Hevjînê wê ji Tetwanê bû û keseke gelek hêja û kurdpewer û qedir bilind bû. wî gelek zû ji nav me koç kir. Diya Cîwan bi serê xwe kur û keçên xwe mezin kir û da xwendin.

Piştî ku min û Gulfer Xanê Diya Cîwan nas kir, dostaniya me ya malbetî gelek pêşket. Ew dostaniya me heta sala 1988an ku em ji Sûriyeyê çûn li Swêdê cîwar bûn, nêzik bû.

Piştî sala 1988an jî dostanî û rêhevaltiya me domand.

Ew ji me û hemû siyasetvanên Bakurê Kurdistanê re di salên tarî û zehmet de bû alîkar.

Diya Cîwan helbestvan bû. Helbestên wê bûne pirtûk.

Kovara me HEVDEMê hevpeyvîneke wê jî weşand.

Ew sîyasetvaneke kurdperwer û bi Rêbaza Barzanî bawer bû. Wê tevgera xwe ya siyasî gor Rêbaza Barzanî didomand.

Endama Komîta Navendî ya Partiya Demokrat A Kirdistanê li Sûriyeyê bû.

Di xebata Doza Kurd û Kurdistanê de û di xebata partiyê de gelek zîrek û çelek bû.

Rêhevalê wê yên endamên partiyê û gel ji wê gelek hez dikirin û ji wê re rêzdar bûn.

Li Herêma Federe ya Kurdistanê jî xwediyê rûmetekê bû.

Ew li Herêma Federe ya Kurdistanê li hemberî nexêrxwazan bi xurtî tevdigeriya.

Ez êşa zarok û malbata wê û hezkirên wê parve dikim.

Bila serê gelê me û zarokên we yên hêja û rêhavelên wê û hezkir-dostên wê û kurdperweran û gelê me sax be. Sebir para wan be.

Diyarbekîr, 26. 02. 2027

(Ev nivîs tenê nêrînên şexsî yên nivîskar derdixe pêş û temsîla nêrînên giştî yên malpera me nake. Berpirsiyariyên huqûqî yên vê nivîsê aîdî nivîskar in.)