Wezîrê Derve yê Fransayê ragihand, pêwîst e rola Kurdên Sûriyeyê di pêvajoya veguhêz a Sûriyeyê de hebe. Herwiha got: “Ew hevalbendên Parîs û Washingtonê ne di şerê li dijî DAIŞê de.”
Wezîrê Derve yê Fransa Jean-Novel Barrot îro 8ê Çile di civîneke rojnamevaniyê de ligel Wezîrê Derve yê Amerîkayê Anthony Blinken li Parîsê got: “Divê rola Kurd di proseya veguhêz a Sûriyeyê de hebe.”
Barrot ji rojnamevanan re got: “Girîng e kontrolkirina metirsiya DAIŞê li Sûriyeyê berdewam be.”Herwiha wî bi amadebûna Wezîrê Derve yê Amerîkayê tekez kir, Kurdên Sûriyeyê di şerê li dijî DAIŞê de hevpeymanên Parîs û Washingtonê ne.
Daxuyaniyên Wezîrê Derve yê Fransayê ji aliyê Wezîrê Derve yê Amerîkayê Anthony Blinken ve jî hat qebûlkirin û got: “Washington bi Tirkiyeyê re di nava pêwendiyeke cidî de ye, ji bo rêgirtina li operasyoneke leşkerî li dijî Kurdên Sûriyeyê.”
Wezîrê Derve yê Fransayê Jean-Noel Barrot û Wezîra Derve ya Almanyayê Annalena Baerbock roja 03.01.2025an bi serdanekê gehiştin Şamê û bi Fermandarê Giştî yê Îdareya Nû ya Sûriyeyê Ehmed Şera re civiyan.
Berî civîna xwe ya bi Ehmed Şera re, Wezîrê Derve yê Fransayê serdana balyozxaneya welatê xwe li Şamê kir û di daxuyaniyeke rojnamevanî de amaje da, “Parîs hêvîdar e Sûriye ji bo hemû welatî û pêkhateyên wê aram, seqamgir û xwediya serweriya xwe be.”
K24
