Hejmarek rêxistinên mafên mirovan û civaka sivîl li Rojavayê Kurdistanê, daxwaza azadkirina rojnamevan û çalakvanên sivîl ên ku li cem Rêveberiya Xweser girtî ne, dikin.
Di daxuyaniyekê de 6 rêxistinên mafên mirovan û civaka sivîl berdewamiya girtina 6 rojnamevan û çalakvanên sivîl ji aliyê rêveberiya xweser ve şermezar kirin.
Herwiha gotin: “Em berdewamiya girtina keyfî û veşartina bi darê zorê ya van rojnamevan û çalakvana bêyî ferman û biryarên dadwerî yên ji aliyê dezgehên şareza ve, nehiştina hevdîtina bi malbatên xwe re, bêparkirina wan ji mafên wan ên rewa yên tayînkirina parêzeran û dernexistina wan pêş dadgehên yasayî yên dadmend, bi tundî şermezar dikin.”
Wan 6 rêxistinan tekez kirin, “Girtina wan ronamevan û çalakvanan, binpêkirina aşkere ya hemû peyman û belgeyên navdewletî û mafên mirovan e.
Gotin jî: “Em nîgeranî û tirsa xwe ya kûr li ser jiyana wan tînin ziman û em revandin û windakirina wan bi darê zorê, wek metirsiyeke rasteqîne li ser jiyana wan dibînin.
Di daxuyaniyê de hat: “Em ligel hemû rêxistinên berevaniya mafên mirovan li Sûriyeyê û rêxistinên civaka sivîl yên jêr îmzekirî, daxwaz ji Rêveberiya Xweser dikin ku wan rojnamevan û çalakvanên girtî bilez azad bike. Herwiha em daxwaz ji wê dikin jî ku dosya binçavkirina siyasî bigire û hemû girtiyên siyasî û girtiyên xwedî bîr bawerî, serbest berde, medam ku ti tometek arasteyî wan nehatiye kirin.”
Li gorî daxuyanê kesên girtî ev in:
1- Ehmed Sofî: Rojnamevan û endamê Encûmena Herêmê ya Partiya Demokrat a Kurdistan – Sûriyê. Cih û dîroka revandinê: Dêrik, 02.04.2024an.
2- Rakan Ehmed: Rojnamevan û endamê Encûmena Şaxê a Partiya Demokrat a Kurdistan – Sûriyê). Cih û dîroka revandinê: Girkê Legê, 31.03.2024an.
3- Merwan Liyanî: Endamê Encûmena xwecihî ya Girkê Legê yê ENKSê). Cih û dîroka revandinê: Girkê Legê, 1ê Nîsana 2024an.
4- Husam Dorsen: Endamê Komîta Herêmê ya Partiya Gel a Kurdistanê – Sûriye). Cih û Dîroka revandinê: Dêrik, 01.04.2024an.
5- Fethî Serhan Kado: Endamê Desteya Şêwirmendiyê ya Partiya Yekîtî ya Kurdistanî). Cih û Dîroka revandinê: Qamişlo 15.6.2024an.
6- Remezan Mehmûd Hacî: Endamê Encûmena Xwecihî ya ENKSê). Cih û Dîroka revandinê: Terbespiyê, 29.08.2024an.
Rêxistinên li binê daxuyaniyê îmze kirine:
1- Rêxistina Mafên Mirov li Sûriyeyê – MAF
2- Rêxistina Berevaniya li Girtiyên Xwedî Nêrîn li Sûriyeyê – Rewangeh
3- Yekîtiya Giştî ya Nivîskar û Rojnamevanên Kurd li Sûriyeyê
4- Rêxistina Jinên Kurd ên Azad
5- Hêzên Civaka Sivîl ên Kurdistanî
6- Komîteya Mafên Mirovan di Hevdîtina Niştimanî de
K24
