PAK, PSK, TDK-TEVGERê Li Amedê Newroz Pîroz Kirin
PAK, PSK, TDK-TEVGERê roja 20.03.2022yê li Amedê û li Îzmîr a bajarê Tirkîyeyê Newroz pîroz kirin.
Li Amedê di hola Hotel Plazayê de bi beşdarîya endamên PAK, PSK, TDK-TEVGERê, nûnerên PDK-Platform, HUDAPAR, DEVA Partisi, Berdevkê Platforma Zimanê Kurdî Şerefxan Cizîrî, Serokê ŞIVIDERê Azîz Ozalp, Swerokê Komeleya Farqînîyan Mehemt Çelîker,nûnerê DIERGê û gelek sîyasetmedar û rewşenbîrên Kurd û gelê me yê Amedê Newroz hate pîroz kirin.Serokê KKPyê Sînan Çîftyurek û rêvebirê KKPyê, parlamenterê HDPyê Nûsrettîn Maçîn jî peyama pîrozbahîyê şandin.
Pîrozbahîya Newrozê bi rêzgirtina ji bo şehîdên Kurdistanê û bi Sirûda Neteweyî Ey Reqîb ê destpê bû.
Di destpêka pîrozbahîyê de Berdevkê PAKê Hanîfî Tûran li ser girîngîya Newrozê axaft û bang li gelê Kurdistanê kir da ku piştigrîyê bidin xebata PAK, PSK, TDK-TEVGERê ya ji bo hûnandina hevkarîyeke li ser Bernameya Daxwazên Acîl ên miletê Kurd. Paşê Serokê Giştî yê PSKyê Mesûd Tek di debarê newrozê , rewşa Kurdistanê û girîngîya hevkarî û tifaqa neteweyî, niştimanî axaftinek kir.
Berdevkê TDK-TEVGERê Yûsûf Aydin jî daxuyanîya hevbeş a PAK, PSK, TDK-TEVGERê ya li ser newrozê xwend.
Pîrozbahîya Newrozê ya li Amedê bi stranên Koma Erbanê ya Jinan a Dîyarbekirê û Hunermendê Kurd Sebahattîn Yildiz(Sebahattîn Xoce) û bi dîlan û govenda beşadaran, bi awayekî bi coş derbas bû.
