NEWROZ LI MILETÊ KURD Û HEMÛ KURDISTANÎYAN PÎROZ BE!/ NEWROZE MILETÊ KURD Û PÊRÛNA KURDISTANÎYAN RÊ PÎROZ BO!

Werin em bi hev re agirê Newrozê ji bo yekitî, hevkarî û yekrêziyê geşbikin!

Werin em bi hev re agirê Newrozê ji bo yekitî, hevkarî û yekrêziyê geşbikin!

Meha adarê, bi rojên şahî û kêfxweşî û herweha bi rojên diltevizînî û komkujîyan ve, di dîroka Kurdistanê de xwedîyê cihekî gelekî girîng û taybetî ye. Kurd û kurdistanî Newrozê, ji alîyekî weke cejna serêsalê û hatina buharê, ji alîyekî din jî weke roja serhildan, berxwedan û tekoşîna ji bo azadî û serxwebûna Kurdistanê pîroz dikin.

Bêguman pîrozkirina Newrozê ya bi vî awayî, dagîrkerên Kurdistanê ditirsîne. Ew ji alîyekî pîrozkirina Newrozê qedexe dikin; ji alîyekî din jî hewl didin ku Newrozê ji armanc û naveroka wê ya sereke bi dûr bixînin. Loma jî ew roja Newrozê, bi naverokên çêkirî yên bêwate pîroz dikin. Ew bawer dikin ku dê bi vî awayî bikaribin Newrozê ji naveroka wê ya dîrokî bi dûr bixînin; tîn û tesîra wê ya li ser hestên neteweyî jar û hejar bikin. Loma jî em gelek girîng dibînin ku miletê Kurd û kurdistanî cejna Newrozê bi ruhekî neteweyî û naveroka xwe ya dîrokî pîroz bikin. Divê em Newrozê, bi armanca li dijî dagîrkerî û zordarîyê û weke sembola berxwedana neteweyî û azadîyê pîroz bikin. Divê em, agirê Newrozê weke qadek girîng ya xebat û têkoşîna li dijî dagirkerî, înkar û asîmîlasyona li ser miletê Kurd û kurdistanîyan bêtir geş û gûr bikin.

Îro li Başûr û Rojavayê Kurdistanê, miletê Kurd û pêkhateyên Kurdistanê cejna Newrozê bi awakî azad pîroz dikin. Lê li Bakurê Kurdistanê, miletê Kurd hê jî nikare bi awakî azad, vê cejna xwe ya neteweyî, li gorî naveroka wê ya dîrokî pîroz bike. Karbidestên dewletê, bi qedexekirin û astengên cihêreng hewl didin ku rê li ber pîrozkirina Newrozê bigrin, ya jî vê roja pîroz şolî bikin. Lê ew çi dikin bila bikin, dagîrkerên Kurdistanê dê nikaribin di vê siyaseta xwe de bi ser kevin; agirê Newrozê dê li her çar alîyên Kurdistanê her geş û bilind bibe.

Di vê pêvajoya ku zimanê kurdî bi jenosîda asîmîlasyonê rû bi rû ye, divê em bi taybetî hewl bidin ku Newrozê bi kurdî pîroz bikin. Dive em hewl bidin ku vê cejna neteweyî, ji bo geşkirina xebat û têkoşîna zimanê kurdî jî bikin qad û derfetek girîng. Herweha divê em vê rojê bikin platformek hevbeş û girseyî ya ji bo bidestxistina mafên neteweyî, civakî û çandî.

Kurdistaniyên hêja!

Dagîrkerên Kurdistanê, êdî weke berê nikarin serwerîya xwe li Kurdistanê bimeşînin. Helwesta hêzên navneteweyî, guherînên li Dinyayê û Rojhelatanavîn, derfetên dîrokî radestî miletê Kurd dikin û zemînê tekoşîna ji bo serxwebûn û azadîya Kurdistanê berfirehtir û bi hêztirdikin. Ev kês û derfet di Rojeva Kurdistanê de bûye diyardeya sereke; lê di heman demê de, girîngiya yekitî, hevkarî û yekrêziya neteweyî ya miletê Kurd û kurdistanîyên vî beşê Kurdistanê jî bêtir derdixîne pêş. Divê em baş bizanibin ku miletê Kurd tenê bi yekitî, hevkarî û yekrêziya neteweyî dê bikaribe destkeftiyên xwe biparêze û ji bo azadî û serxwebûna Kurdistanê pêngavên biryardêr bavêje.

Bakurê Kurdistanê di pêvajoyeke gelekî taybetî û metirsîdar de derbas dibe. Ev rewşa wezîfeyên taybetî derdixînê pêşiya me. Divê partî, rêxistin û tevgerên neteweyî û kurdistanî rojek berî rojekê li ser armanc û daxwazên acîl yên hevbeş bêne ba hevdû û di vî warî de gavên pêwîst bavêjin. Ev wezîfeyek neteweyî û dîrokî ye. Divê em hewildanên yekitî, hevkarî û yekrêziya neteweyî geş bikin; parastin û vejandina hişmendî û destkeftiyên neteweyî bêtir derxînin pêş.

Bijî sembola berxwedan û tekoşîna azadî û serxwebûnê Newroz!

Bijî yekrêziya neteweya kurd û kurdistanîyan!

21ê adarê 2022

– Partîya Azadîya Kurdistanê (PAK)

– Partiya Sosyalîst a Kurdistanê (PSK)

– Tevgera Demokratîk a Kurdistanê (TDK-Tevger)

 

NEWROZE MILETÊ KURD Û PÊRÛNA KURDISTANÎYAN RÊ PÎROZ BO!

Bênê ma pîya adirê Newroze semedê yewitî, hemkarî û yewrêziye webike!

Aşma adare bi rojanê şayî û keyfweşî û ancî bi rojanê xemgînî û komkiştişan tarîxê Kurdistanî de wayîrê cayêkê zaf muhîm û taybetî ya. Kurd û kurdistanî Newroze hetêkî ra sey roşanê serra newîye û ameyîşê wisarî, hetê bînî ra sey roja serehewenayîşî, xoverrodayîşî û tekoşînê semedê azadî û xoserîya Kurdistanî pîroz kenê.

Bêguman pîrozkerdişê Newroze bi no qeyde, dagîrkeranê Kurdistanî tersneno. Ê, hetêkî ra pîrozkerdişê Newroze qedexe kenê; hetêkî ra zî kenê ke, Newroze armanc û muhtewaya ci ya esasî ra dûrî bivisnê. Coka zî roja Newroze bi muhtewaya viraşte û bêmana pîroz kenê. Ê bawer kenê ke, bi no qayde do bieşkê Newroze manaya xo ya tarîxî ra dûrî bivisnê; tîn û tesîrê ey o ser hîsanê neteweyî bikişê. Coka zî ma zaf qîmetin vînenê ke miletê Kurd û kurdistanî roşanê Newroze bi ruhêko neteweyî û bi muhtewaya ci ya tarîxî pîroz bikê. Gereke Newroze, bi armancê vera dagîrkerî û zordariye û sey sembolê xoverrodayîşê neteweyî û azadîye pîroz bikê. Gere ma adirê Newroze sey beşêko muhîm yê xebate û têkoşînê vera dagirkerî, înkar û asîmîlasyonê ser miletê Kurd û kurdistanîyan webike.

Ewro Başûr û Rojavayê Kurdistanî de, miletê Kurd û şarê Kurdistanî roşanê Newroze bi hawêko azad pîroz kenê. La Bakurê Kurdistanî de, miletê Kurd hîna zî nêeşkeno bi hawakêko azad nê roşanê xo yê neteweyî pîroz biko. Îdarekarê dewlete bi qedexekerdiş û astenganê cîya bi cîyayan kenê ke  pîrozkerdişê Newroze asteng bikê. La ê se kenê wa bike, dagîrkerê Kurdistanî do nêeşkê nê siyasetê xo de serbikewê; adirê Newroze do her çar hetanê Kurdistanî de webibo û berz bibo.

No proseso ke ziwanê kurdî bi jenosîdê asîmîlasyonî rê rîbirî yo de gere ma bi taybetî hewl bide ke Newroze bi kurdî pîroz bike. Ganî ma hewl bide ke nê roşanê neteweyî semedê averberdişê xebate û têkoşînê ziwanê kurdî zî bike îmkanêko muhîm. Heto bîn ra ma na roje semedê destvistişê heqanê neteweyî, komelkî û kulturî bike platformêk hempar.

Kurdistanîyê ercîyayê!

Dagîrkerê Kurdistanî êdî sey verî nêeşkenê serwerîya xo Kurdistan de biramnê. Helwesta hêzanê mîyanneteweyî, bedilyayîşê Dinya û Rojhelatê Mîyanênî de îmkanî nikayînî hetê miletê Kurd kenê û zemînê tekoşînê semedê xoserî û azadîya Kurdistanî hîra û hêzin benê. Îmkano ke Rojavayê Kurdistanî de virazîyayo nimune yo; la  eynî wextî de muhîmîya yewitî, hemkarî û yewrêziya neteweyî ya miletê Kurd û kurdistanîyê nê beşê Kurdistanî de zêdêr vejyeno ver. Ganî ma baş bizane ke miletê Kurd tena bi yewitî, hemkarî û yewrêziya neteweyî do bieşko destvistişanê xo bipawo û semedê azadî û xoserîya Kurdistanî gamanê pîlan bierzo.

Bakurê Kurdistanî prosesêko zaf taybet û tehlukeyînî ra vîyareno. Na rewşe zî wezîfeyo taybet erzeno vernîya ma. Gere partî, rêxistin û hereketê neteweyî û kurdistanî ca de armanc û waştişanê acîlan yê wertaxan ser o bêrê yewca û nê warî de gamanê muhîman bierzê. No wezîfeyêko neteweyî û tarîxî yo. Gere semedê yewitî, hemkarî û yewrêziya neteweyî xebatî bêrê kerdene; destvistişanê neteweyî ser o bêro vindertene.

Biciwîyo sembolê xoverrodayîş û tekoşînê azadî û xoserîya Newroze!

Biciwîyo yewrêziya neteweya kurd û kurdistanîyan!

21ê adare 2022

– Partîya Azadîya Kurdistanî (PAK)

– Partiya Sosyalîst a Kurdistanî (PSK)

– Tevgera Demokratîk a Kurdistanî (TDK-Tevger)

Leave a Reply

Your email address will not be published. Required fields are marked *