Encûmena Niştimanî ya Kurdî li Sûriyê (ENKS) bang li civaka navdewletî û aliyên navdewletî dike ku li gorî biryara navdewletî ya 2254, çareseriya siyasî ya li wî welatî aktîv bikin.
ENKSê duhî 30ê Adarê li Qamişlo civiya û piştî civînê de di daxuyaniyekê de ragihand, wan di civînê de karnameya xebatê pesend kirin ku tê de rewşa siyasî, rêxistinî û kar û xebatên Encûmenê di heyama borî de cih girtibû.
ENKSê amaje bi salvegera 13emîn a şoreşa Sûriyeyê kir û got: “Piştî derbasbûna 13 salan di ser şoreşa Sûriyê re, hîn şer berdewam e û êş û azarên Sûriyê li ser astên curbicur zêde dibin, herwiha bi geşedanên herêmî û encamên niha re dijwartir bûne, di demekê de ku çareseriya siyasî girtî maye û Komîteya Destûrî nekariye gerên xwe ji nû ve dest pê bike ku rejîm pêdegiriyê li ser têkdana wê dike.”
ENKSê dibêje: “Bi nebûna ti çareseriyekê, ji bilî çareseriya siyasî bi rêya danûstandinan re, daxwaz ji civaka navdewletî û aliyên navdewletî tê kirin ku li gorî biryara navdewletî ya 2254 pêvajoya siyasî bimeşînin û aktîv bikin.”
Herwiha ENKSê tekezî li ser bidawîkirina kirîza Sûriyê û pêkanîna daxwazên gel û pêkhateyên wê yên niştimanî yên rewa kir û got: “Cibicîkirina mafên gel û pêkhateyên Sûriyê yên niştimanî di destûrê de, kilîta çareserkirina kêşeyên mayî li herêmê û faktora aramiyê ye.”
