Çekdarên di bin kontrola Tirkiyeyê de xweza, dewlemendî û dar û berên Efrîna Rojavayê Kurdistanê talan dikin.
Çekdarên bi ser Tirkiyeyê ve her û her darên Efrînê dibirin, bi taybetî jî darên zeytûnan û darên fêkî.
Çalakvanê sivîl û mafnas Îbrahîm Şêxo Tora Medyayî ya Rûdawê diyar kir ku ji destpêka dagirkirinê ve bêhtir ji sedî 30ê darên Efrînê hatine birîn.
Îbrahîm Şêxo diyar kir ku bi taybetî ji sala 2023yan ve birîna daran gelekî zêdetir bûye.
Çekdarên grûpa bi navê Feyleq El-Şamê ya bi ser Tirkiyeyê ve 22-23yê Tebaxê li gundê Îskê yê Cindirêsê nêzîkî 800 darên mişmiş, xox û gwîzan birîne.
Ev dar ên welatiyê Kurd ê bi navê Ekrem Mistefa Şêxo ne û ew xelkê gundê Celemê yê Cindirêsê ye.
Her wiha çekdaran nêzîkî 1000 darên hinaran birîne.
Çekdarên Hemzatê jî ji sala 2018yan ve dest daniye ser nêzîkî 700 darên zeytûnan û 16 hektar zeviyên çandiniyê yên Ekrem Mistefa Şêxo yên li gundê Firêriyê.
Çekdarekî Feyleqe El-Şamê jî dest daniye ser mala wî ya li gundê Celemê.
Dagirkirina Efrînê
Artêşa Tirkiyeyê û grûpên çekdarên ên di kontrola wê de, 20ê Kanûna Paşîna 2018an ji asman û bejahiyê ve bi awayekî berfireh êrişî Efrînê kir ku wê demê di destê Kurdan de bû.
Piştî wê êrişa berfireh a bi çekên giran, bajarê Efrînê 18ê Adara 2018an ket destê artêşa Tirkiyeyê û grûpên çekdar.
Di encama êrişên giran û dagirkirinê de bi sed hezaran Kurd ji mal û milkên xwe bûn û ketin ser rê û dirbên koçberiyê.
Ji roja ku Efrîn ketiye bin dagirkeriya Tirkiyeyê ve girtin, binpêkariyên wekî dizî, talan, tecawuz, birîndarkirin, kuştin, revandin û şkenceyên li hemberî Kurdan berdewam dikin.
Rûdaw
