Serokwezîrê Almanyayê Olaf Scholz ragihand ku ew xema leşkerên xwe yên li Îraq, Herêma Kurdistanê û herêmê dixwin.
Olaf Scholz ji Tora Medyayî ya Rûdawê re da zanîn ku leşkerên wan di çarçoveya sozên piştgiriyê yên navneteweyî de li wan welatan in û got:
“Em dê ji bo silametiya leşkerên xwe yên li Îraq û herêmê bixebitin.”
Almanyayê 13ê Îlona 2023yan erkê leşkerên xwe yên li Îraq û Herêma Kurdistanê saleke din dirêj kir.
Almanya ji sala 2014an ve di nava Hevpeymaniya Navneteweyî ya li Dijî DAIŞê de cih digire.
Erkên hêzên Almanyayê yên li Îraq û Herêma Kurdistanê wiha ne:
– Perwerdeya Pêşmerge û hêzên ewlehiyê yên Îraqê
– Alîkarîdayîna Hikûmeta Herêma Kurdistanê ji bo yekkirina Pêşmergeyan
– Şopandina tevgerên DAIŞê û parvekirina van agahiyan bi Pêşmerge û artêşa Îraqê re
– Dabînkirina petrolê ji bo balafirên welatên ku di nava Hevpeymaniya Navneteweyî ya li Dijî DAIŞê de cih digirin
Li hêla din, li gorî biryara Parlamentoya Almanyayê, dê hêzên wan heta 31ê Çiriya Pêşîna 2024an li Îraq û Herêma Kurdistanê bimînin.
