Li parka dîrokî (Rûsya-Dirokma) ya bajarê Omskê, bo cara yekem Festîvala Rojên Çanda Kurdî tê lidarxistin.
Serokê Otonomiya Netewî û Çandî ya Kurdî li Omska Rûsyayê Mûsa Newrozevîç ji K24ê re ragihand, Festîvala Rojên Çanda Kurdî di 2’ê Tebaxê de dest pê kir û dê heta 16ê Tebaxê berdewam bike.
Diyar kir jî: “Di festîvalê de, em ê çand, dîrok û kevneşopiyên xwe yên neteweyî bi rêya tablo, wêne û vîdyoyan pêşkêşî mêvanên festîvalê bikin.”
Herwiha got: “Em ê rûniştevan û mêvanên Omskê bi pêvajoya zewaca kurdî bidin nasîn. Cil û bergên neteweyî ji çi pêk tên û jê re çi tê gotin, kurd kîjan amûrên muzîkê dijenin û xwarinên wan ên neteweyî çi ne jî bidin nasîn.”
Destnîşan kir jî, “Beşek ji festîvalê ji bo nîşandana dîroka hevdem, çand û kevneşopiyên kurdan, dîroka kurdên Rûsyayê û herêma Omskê, navdarên kurd li Rûsyayê û cîhanê, kurd di dema Şerê Cîhanê yê Duyem û şerên din de, hatiye terxankirin.”
