YouTubeyê biryar da ku zêdetirî 20 kanalên Kurdî yên ku girtibûn, li xwediyên wan vegerîne.
Zêdetirî 20 kanalên Kurdî bi hinceta ku heman hesabê AdSenseyê bi kar tînin ji aliyê YouTubeyê ve hatibûn girtin.
Hat ragihandin ku bi biryareke nû ya YouTubeyê hemû kanal ji nû ve li xwediyên wan hatine vegerandin.
Biryar ji bo civaka YouTuberên Kurd ên ku demeke dirêj bû pêvajo dişopand bû sedema rihetî û kêfxweşiyeke mezin.
Çavkaniya pirsgirêkê bi binpêkirina mafê telîfê yê 17ê meha borî dest pê kiribû.
Piştî ku kanalek li gorî îdiayê ji ber binpêkirina mafê telîfê hat girtin, YouTubeyê hemû kanalên din ên ku bi heman hesabê AdSenseyê ve girêdayî bûn bi komî girtin.
Lê belê piraniya van kanalan ti rêgez binpê nekiribûn.
Di vê pêvajoyê de bi dehan YouTuberan ev rewş wekî neheqî û nezelal bi nav kirin.
Kampanyayên piştgiriyê yên ku li ser medyaya civakî hatin destpêkirin, bi piştgiriya saziyên medyaya dijîtal û şopîneran di demeke kurt de dengekî mezin veda.
“Em bi taybetî spasiya Rûdawê dikin”
YouTuber Zana Xazî Ezîz (Ezîz Altun) ku kanala wî ji nû ve hatiye vekirin, ji Rûdawê re hestên xwe wiha anî ziman:
“Dîtina platformeke ku me bi salan bi kedeke mezin ava kiribû ji nişka ve ji holê rabe, gelekî ne xweş bû.
Lê îro em gelekî kêfxweş in. Kanalên me vegeriyan û em dê ji nû ve pêşkêşkirina naverokên bi kalîte ji temaşevanên xwe re bidomînin.
Em bi taybetî spasiya Rûdawê dikin ku di vê pêvajoyê de li cem me sekinî û alîkariya me kir ku dengê xwe bigihînin.”
YouTuberekî din, Mebest Behadîn (bi navê Mebest King tê naskirin), berê girtina kanala xwe wekî “neheqiyeke mezin” nirxandibû.
Mebest Behadîn jî di peyama xwe ya spasiyê de wiha got:
“Di wan rojên zor de Rûdaw wekî dostekî li cem me bû.
Alîkariya me kir ku em dengê xwe bigihînin cîhanê.
Em spasiya her kesê ku di çareserkirina vê pirsgirêkê de keda wan heye dikin.”
Tê gotin ku hejmara giştî ya aboneyên kanalên girtî ji 2 milyonan zêdetir bûye, kanala herî mezin zêdetirî 400 hezarî û kanala herî biçûk jî nêzîkî 100 hezar aboneyên wê hebûn.
Ev pêşhate ji bo berhemênerên ku di qada medyaya dijîtal a Kurdî de çalak in, wekî destkefteke girîng tê nirxandin.
Biryara YouTubeyê hem morala berhemêneran bilind kir hem jî hêviyên ku berhemanîna naveroka Kurdî dê li ser platformên dijîtal bi awayekî bihêztir berdewam bike, ji nû ve geş kir.
